«Türkmenhowaýollary» agentliginiň Howa ulaglarynyň işgärlerini taýýarlaýan mekdebinde Türkmenistanyň Prezidenti Serdar Berdimuhamedowyň adyndan mekdebiň talyp gyzlaryna ýurdumyzda giňden bellenilýän Halkara zenanlar güni mynasybetli pul sowgatlarynyň gowşurylyş dabarasy geçirildi.

Sowgat gowşurylyş dabarasy ýurdumyzyň hünär okuw jaýlarynda bilim alýan ýaş aýal-gyzlaryň aýratyn üns merkezinde bolýandygyny we olara uly hormat goýulýandygyny görkezdi.

Geljekde «Türkmenhowaýollary» agentliginiň Howa ulaglarynyň işgärlerini taýýarlaýan mekdebiniň talyplary Türkmenistanyň awiasiýa pudagynda möhüm orun tutup, raýat awiasiýasynyň ösüşine we ýurduň halkara abraýynyň pugtalandyrylmagyna öz goşantlaryny goşar. Dabaraň dowamynda olar hormatly Prezidentimize alkyş sözlerini aýtdylar we okuwda, hünär taýýarlygynda ýokary netijelere ýetmek üçin ähli güýçlerini gaýgyrmajakdyklaryna ynandyrdylar.