Türkmenistanyň raýatlaryndan ybarat bolan zyýaratçylaryň uly topary mukaddes haj parzyny berjaý etmek maksady bilen, 15-nji maýda Saud Arabystany Patyşalygyna ugradyldy. Bu baradaky habar «Watan» habarlar gepleşiginiň göni ýaýlymynda mälim edildi.

Mukaddes topraklara gezelenje ugramazdan öň, zyýaratçylar ilki paýtagtymyzdaky Hezreti Omar metjidine baryp, durnuklylyk we abadançylyk dilediler. Musulman dünýäsiniň iň uly baýramlarynyň biri bolan Gurban baýramynyň öňüsyrasynda ýurdumyzyň bäş welaýatyndan we Aşgabat şäherinden saýlanyp alnan ildeşlerimiz dünýäniň dürli künjeklerinden geljek millionlarça musulmanlar bilen bilelikde Mekge we Medine şäherlerindäki mukaddes ýerlere, şol sanda mukaddes Käbä tagzym edip, degişli dini däp-dessurlary berjaý ederler.

Bu asylly çäre Türkmenistanyň Prezidentiniň gol çeken ýörite Buýrugy esasynda amala aşyrylýar.

Şeýle hem degişli resminama esasynda «Türkmenhowaýollary» döwlet gullugyna ýörite uçar gatnawyny guramak tabşyryldy. Oňa laýyklykda, raýatlarymyzy mukaddes topraklara ygtybarly eltmek we yzyna getirmek işleri gullugyň öz serişdeleriniň hasabyna amala aşyrylar.