«Türkmenhowaýollary» döwlet gullugynyň Howa ulaglarynyň işgärlerini taýýarlaýan mekdebinde Bilimler we talyp ýaşlar güni hem-de täze okuw ýylynyň başlanmagy mynasybetli türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň 2026-njy ýylyň 2-nji sentýabrynda Arkadag şäheriniň «Ruhyýet» köşgünde geçiren umumy okuw sapagynyň esasy mazmuny boýunça wagyz-nesihat çäresi geçirildi. Oňa mugallymlar we talyplar gatnaşdylar. Bu barada mekdebiň metbugat gullugy habar berdi.

Duşuşykda Milli Liderimiziň çykyşynda öňe süren pikirleriniň ýaş nesli bilimli, watansöýüji we giň dünýägaraýyşly hünärmenler edip ýetişdirmekde möhüm ähmiýete eýedigi nygtaldy. Şeýle hem Garaşsyzlyk we Bitaraplyk ýörelgeleriniň halkymyzyň taryhy ýolundaky orny barada giňişleýin gürrüň edildi.

Okuw sapagynda ýaşlaryň häzirki zaman ösüşlerine düşünmek, sanly bilim mümkinçiliklerinden netijeli peýdalanmak, daşary ýurt dillerini öwrenmek hem-de milli terbiýäni pugtalandyrmak boýunça alnyp barylmaly işler barada pikir alşyldy.

Mekdepde talyplaryň ylymly-bilimli, kämil hünärmenler bolup ýetişmegi üçin döredilýän şertleri has-da ösdürmek, «Akylly jemgyýet», sanly bilim we beýleki möhüm ugurlar boýunça ýörite sapaklary hem-de bäsleşikleri geçirmek meýilleşdirilýär.