Türkmenistan halkara ýardam etmek ýörelgelerine hem-de hemişelik oňyn Bitaraplyk syýasatyna ygrarly bolmak bilen, soňky günlerde Ýakyn Gündogarda emele gelen ýagdaý bilen baglylykda, uçuş ugurlaryny üýtgetmäge mejbur bolan daşary ýurt awiakompaniýalary üçin öz howa giňişliginden päsgelçiliksiz peýdalanmagy gyssagly we netijeli üpjün edýär.

“Türkmenhowaýollary” agentligi tarapyndan daşary ýurt awiakompaniýalarynyň uçarlarynyň Aşgabat halkara howa menziline gonmagy üçin rugsatlar wagtynda we çalt berilýär. Türkmenistanyň Daşary işler ministrligi, Türkmenistanyň Döwlet migrasiýa gullugy hem-de beýleki döwlet edaralary bilen bilelikde degişli işler alnyp barylmagynyň netijesinde türkmen-eýran serhet nokatlaryndan başlap, Aşgabadyň Halkara howa menziline çenli päsgelçiliksiz geçelge üpjün edilýär. Daşary ýurt döwletleriň ilçihanalary we diplomatik edaralary öz raýatlaryny hem-de goňşy ýurtlaryň raýatlaryny ulag bilen üpjün etmek maksady bilen Aşgabadyň Halkara howa menzilinden ýörite gatnawlary gurnaýarlar. “Türkmenhowaýollary” agentligi tarapyndan diplomatik wekilhanalara, uçarlaryň ekipažlaryna giň goldaw berilýär we ýolagçylar ýokary derejeli hyzmatlar bilen üpjün edilýär.

Şunuň bilen baglylykda, Türkmenistan halkara kanunçylyga hem-de ynsanperwerlik ýörelgelerine ygrarlydygyny, şeýle hem çylşyrymly halkara ýagdaýlarynda raýdaşlygyny we goldawyny görkezýär.