«Pähim-paýhas ummany Magtymguly Pyragy» ýyly «Türkmenhowaýollary» agentligi üçin raýat awiasiýasy we halkara hyzmatdaşlygy babatynda uly üstünliklere beslendi. Türkmenistanyň Prezidenti Serdar Berdimuhamedowyň we türkmen halkynyň Milli Lideri Gurbanguly Berdimuhamedowyň öňdengörüjilikli başlangyçlary netijesinde ýurdumyz Merkezi Aziýanyň möhüm ulag merkezi hökmündäki ähmiýetini has-da ýokarlandyrdy. Bu babatda geçen ýylyň dowamynda halkara gatnawlarynyň birnäçesiniň ýola goýulmagy, degişli halkara guramalar bilen hyzmatdaşlyk meseleleri boýunça gazanylan ylalaşyklar, geçirilen gepleşikler hem möhüm ähmiýete eýe boldy. Şunda ýolagçylaryň Jidda, Milan, Bangkok, Hoşimin we Kuala-Lumpur ýaly meşhur syýahatçylyk ugurlaryna bolan islegleriniň hem artandygyny bellemek gerek.

Bangkok bilen howa gatnawynyň ýola goýulmagy, ýolagçylar üçin mümkinçilikleriň giňeldilmegi uçuşyň bu ugrunyň ilat arasynda meşhurlygynyň artmagyna getirdi. Syýahatçylar üçin iki ýurduň arasyndaky gatnawyň bahasynyň elýeterli, hyzmatlaryň hiliniň bolsa ýokary bolmagy aýratyn bellärliklidir.

2024-nji ýylda halkara gatnaşyklary yzygiderli işjeňleşdirmek bilen bir hatarda, birnäçe daşary ýurt bilen göni howa gatnawlaryň dikeldilmegi ugrunda hem möhüm işler alnyp baryldy. Bu ugurda daşary ýurtly hyzmatdaşlar bilen degişli gepleşikler yzygiderli geçirildi. Gepleşikleriň dowamynda Türkmenistanyň sebitiň möhüm ulag-üstaşyr merkezi we howa gatnawlarynyň ösmegine ýardam bermekdäki ornuna üns çekildi.

Halkara gatnawlarda "Türkmenistan" awiakompaniýasy" AGPJ tarapyndan uçarlara ornaşdyrylan multimedia dynç alyş ulgamy möhüm täzelikleriň biri boldy. Indi ýolagçylar uzak wagtlaýyn uçuşlarda dürli filmleri, sesli kitaplary we sazlary diňläp, lezzet alyp bilýärler. Bu hyzmat ýolagçylara mugt hödürlenýär we ulanmak has-da aňsatdyr.

Umuman, 2024-nji ýyl ähli babatda «Türkmenhowaýollary» agentligi üçin uly üstünliklere beslendi. Strategik çözgütler, hyzmatlaryň döwrebaplaşdyrylmagy we uçuş ugurlarynyň geografiýasynyň giňeldilmegi arkaly Türkmenistanyň halkara ýolagçy gatnawlarynda eýeleýän orny has-da pugtalandyryldy. Biziň ýurdumyz raýat awiasiýasyny ösdürmäge, dünýä ülňülerine laýyk gelýän ýokary hilli hyzmaty ýola goýmaga ygrarlydygyny ýene bir gezek doly tassyklady.  «Türkmenhowaýollary» agentligi 2025-nji — Halkara parahatçylyk we ynanyşmak ýylyny hem Arkadagly Gahryman Serdarymyzyň, Gahryman Arkadagymyzyň saýasynda uly üstünliklere beslemek maksady bilen, ýylyň ilkinji günlerinden tutanýerli işe başladylar.