«Türkmenhowaýollary» agentligi Ýewropada Howpsuzlyk we Hyzmatdaşlyk Guramasynyň Aşgabatdaky Merkezi (ÝHHG) bilen bilelikdäki okuw çäreleriniň çäginde halkara nazaryýet okuw maslahaty geçirdi.

«Pähim-paýhas ummany Magtymguly Pyragy» ýylynda hormatly Prezidentimiziň baştutanlygynda Türkmenistanyň raýat awiasiýa pudagy üçin halkara derejesindäki hünärmenleri taýýarlamaga aýratyn ähmiýet berlip, bu ugurda adam maýasyny emele getirmekdäki döwlet goldawy howa ulaglary pudagyny mundan beýläk-de ösdürmäge uly itergi berýär.

Häzirki wagtda, «Türkmenhowaýollary» agentliginiň işgärleriniň hünär derejelerini halkara derejelerine ýetirmek bilen bagly, halkara guramalary hem-de iri daşary ýurt awiakompaniýalary bilen hyzmatdaşlyk alnyp barylýar.

Şunuň bilen baglylykda, Ýewropada Howpsuzlyk we Hyzmatdaşlyk Guramasynyň Aşgabatdaky Merkeziniň başlangyjy esasynda bilelikde gurnalan «Howa menzillerinde ýolagçylary barlamak we rentgenoskopiki suratlary okamak» atly okuw çäresi boýunça «Türkmenhowaýollary» agentliginiň hünärmenleriniň başarnyklaryny artdyrmak maksady bilen, Ýewropada Howpsuzlyk we Hyzmatdaşlyk Guramasynyň Aşgabatdaky Merkeziniň binýadynda 25-29.11.2024ý. sene aralygynda nazaryýet okuw maslahaty geçirildi.

Bu okuw çäresine «Türkmenhowaýollary» agentliginiň, Türkmenistanyň Içeri işler ministrliginiň, Türkmenistanyň Döwlet gümrük gullugynyň we Türkmenistanyň Döwlet serhet gullugynyň  degişli hünärmenleri gatnaşdy we synaglary üstünlikli tamamlanlaryndan soň bellenilen halkara ülňülere laýyk gelýän degişli şahadatnamalary resmileşdirilip berildi.

Bu alnyp barylýan beýik maksatly işler türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň uly tagallalarynyň üstünlikli durmuşa geçirilýändiginiň aýdyň subutnamasy bolup durýar.

Türkmen halkyny şeýle ajaýyp zamanada ýaşadýan türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň halkymyzyň eşretli we parahat durmuşynyň hatyrasyna amala aşyrýan işleriniň rowaç almagyny, belent başlarynyň hemişe aman bolmagyny, janlarynyň sag, ömürleriniň uzak bolmagyny arzuw edýäris!