23-nji maýda Türkmenistanyň Mejlisiniň wekilleri Gyrgyz Respublikasynyň Bişkek şäherinde geçirilen Merkezi Aziýa ýurtlarynyň zenanlarynyň Dialogynyň birinji maslahatyna gatnaşdylar. «Merkezi Aziýa ýurtlarynyň ykdysadyýetlerinde zenanlaryň orny: sanly, durmuş we ekologik innowasiýalary ösdürmek üçin liderlik» temasy boýunça geçirilen maslahatda milli parlamentiň wekilleri zenanlaryň milli ykdysadyýetiň pudaklaryny ösdürmäge gatnaşygy, zenanlaryň hukuk kepillikleri we durmuş ýeňillikleri barada çykyş etdiler. 

Maslahatyň dowamynda klimatyň üýtgemeginiň şertlerinde ykdysady, sanly we ekologik innowasiýalar babatynda hyzmatdaşlygy ösdürmekde zenanlaryň orny barada çykyşlar diňlenildi we degişli ugurlar boýunça pikir alşylmalar boldy. 

Gender deňligini öňe sürmek üçin sebitleýin meýdança bolan Merkezi Aziýa ýurtlarynyň zenanlarynyň Dialogy parahatçylygy, abadançylygy we durnukly ösüşi pugtalandyrmak maksady bilen sebitdäki ýurtlaryň arasynda hyzmatdaşlygy giňeltmek üçin özboluşly gural bolup çykyş edýär.

Çeşme: Türkmenistanyň Mejlisi