Türkmenistanyň Garaşsyzlygynyň 35 ýyllyk baýramynyň öňüsyrasynda Aşgabat we Arkadag şäherlerinde ýurdumyzyň dürli pudaklarynda netijeli zähmet çekip, milli ykdysadyýetiň we jemgyýetçilik durmuşynyň ösüşine mynasyp goşant goşan raýatlara ýokary döwlet sylaglaryny gowşurmak dabaralary geçirildi. Bu barada «Türkmenistan: Altyn asyr» elektron gazeti habar berdi.

24-nji sentýabrda geçirilen dabaralarda önümçiligiň öňdebaryjylaryna, ministrlikleriň we pudaklaýyn dolandyryş edaralarynyň işgärlerine, şeýle hem medeniýet, sungat we döredijilik ulgamynyň wekillerine hormatly atlar dakyldy. Hökümet wekilleri sylaglanan ildeşleri ýetip gelýän Garaşsyzlyk baýramy bilen gutlap, olaryň halkymyzyň abadançylygynyň, Watanymyzyň ösüşiniň bähbidine alyp barýan işlerinde täze üstünlikleri arzuw etdiler. Bu dabaralar ýurdumyzda halal we netijeli zähmete ýokary baha berilýändiginiň, hünärmenleriň üstünlikleriniň döwlet derejesinde höweslendirilýändiginiň aýdyň beýany boldy.

Döwlet sylaglaryna mynasyp bolan raýatlaryň arasynda ykdysadyýet, senagat, nebitgaz, ulag, aragatnaşyk, oba hojalygy, bilim, ylym, saglygy goraýyş, medeniýet, sungat we beýleki ugurlaryň görnükli wekilleri bar. Olar önümçiligi ösdürmekde, täze tehnologiýalary ornaşdyrmakda, hyzmatlaryň hilini ýokarlandyrmakda, milli medeniýeti we döredijiligi ösdürmekde gazanan üstünlikleri üçin sylaglanyldy.

Ýokary döwlet sylaglary Türkmenistanyň Halk Maslahatynyň nobatdaky mejlisinde hormatly Prezidentimiz Serdar Berdimuhamedowyň gol çeken degişli Permanlaryna laýyklykda gowşuryldy. Bu sylaglar Garaşsyz döwletimiziň ykdysady kuwwatyny artdyrmaga, jemgyýetçilik ösüşine, ylmyň, bilimiň, medeniýetiň we sungatyň kämilleşmegine uly goşant goşan raýatlaryň köpýyllyk halal zähmetine berlen ýokary baha boldy.

Şeýle hem ýurdumyzyň birnäçe raýatlaryna «Türkmenistanyň halk artisti», «Türkmenistanyň halk suratkeşi», «Türkmenistanyň halk bagşysy», «Türkmenistanyň at gazanan senagat işgäri», «Türkmenistanyň at gazanan gurluşykçysy», «Türkmenistanyň at gazanan ulag işgäri», «Türkmenistanyň at gazanan aragatnaşyk işgäri», «Türkmenistanyň at gazanan oba hojalyk işgäri», «Türkmenistanyň at gazanan saglygy goraýyş işgäri», «Türkmenistanyň at gazanan medeniýet işgäri», «Türkmenistanyň at gazanan artisti», «Türkmenistanyň at gazanan bagşysy», «Türkmenistanyň sungatda at gazanan işgäri», «Türkmenistanyň at gazanan žurnalisti», «Türkmenistanyň durmuş hyzmaty çygrynyň at gazanan işgäri», «Türkmenistanyň at gazanan uçarmany» hormatly atlar dakyldy.

Dabaralarda ýaş nesli watançylyk, zähmetsöýerlik we milli gymmatlyklara hormat goýmak ruhunda terbiýelemekde hyzmatlary bilen tapawutlanan ýaşululara «Hormatly il ýaşulusy» diýen hormatly adyň, şeýle hem zenanlaryň ençemesine «Zenan kalby» ordeniniň gowşurylandygy bellenildi.

Türkmenistanyň Prezidentiniň «Türkmeniň Altyn asyry» atly baýragynyň ýeňijilerine hem döwlet sylaglary gowşuryldy. Bu baýrak döredijilik işgärleriniň milli medeniýeti ösdürmekdäki, halkymyzyň ruhy dünýäsini baýlaşdyrmakdaky hyzmatlaryna ýokary baha hökmünde kabul edildi.

Hormatly Prezidentimiz döwlet sylaglaryna mynasyp bolan döredijilik işgärlerini we «Türkmeniň Altyn asyry» bäsleşiginiň ýeňijilerini gutlady. Gutlagda medeniýetiň we sungatyň ösdürilmeginiň, medeni diplomatiýanyň halkara gatnaşyklardaky ähmiýetiniň aýratyn bellenilýändigi nygtaldy.

Sylaglanan raýatlar hormatly Prezidentimize we Gahryman Arkadagymyza bildirilen ynam hem-de zähmetlerine berlen ýokary baha üçin hoşallyk sözlerini aýdyp, ýurdumyzyň ösüşine, halkymyzyň bagtyýar durmuşyny üpjün etmäge gönükdirilen işlere mundan beýläk-de mynasyp goşant goşjakdyklaryny bellediler.