Brýusselde ýerleşýän Halkara Harby Sport Geňeşiniň (CISM) ştab-kwartirasynda Merkezi Aziýa ýurtlarynyň ilçileri bilen degişli guramanyň Baş sekretary harby deňiz güýçleriniň kapitany Roberto Rekkýanyň arasynda duşuşyk geçirildi. Duşuşykda CISM-iň işleri, başlangyçlary we guramanyň howandarlygynda geçirilen halkara sport çärelerine Merkezi Aziýa ýurtlarynyň gatnaşmagy bilen baglanyşykly meseleler ara alnyp maslahatlaşyldy.

CISM-iň Baş sekretary guramanyň işi barada giňişleýin aýdyp berdi we Merkezi Aziýa ýurtlarynyň dünýäde geçirilýän sport ýaryşlaryna has işjeň gatnaşmagynyň ähmiýetini nygtady. Şeýle hem, CISM-iň harby sporty ösdürmek we sport başlangyçlary arkaly halkara gatnaşyklaryny berkitmek üçin öz işlerine mümkin boldugyça köp ýurt çekmäge synanyşýandygyny belläp geçdi.

Türkmenistanyň Ilçisi Sapar Pälwanow duşuşykda sport ýurduň içerki we daşary syýasatynda ileri tutulýan ugurlaryň biridigini belledi we 2017-nji ýylda Aziýa oýunlaryny geçirmekdäki üstünlikli tejribäni göz öňünde tutup, Türkmenistany iri halkara ýaryşlarynyň geçiriljek ýeri hökmünde hödürlemäge taýýardygyny nygtady.

Häzirki wagtda türkmen türgenleri, esasanam harby pälwanlar, Özbegistanda dowam edýän sport çärelerine gatnaşyp, taýýarlygynyň ýokary derejesini görkezýärler. Türkmenistan, halkara sport başlangyçlaryna gatnaşygyny berkidip, CISM bilen hyzmatdaşlygy has işjeň ösdürmegi maksat edinýär.

Çeşme: Türkmenistan Halkara habarlar merkezi