28-nji sentýabrda BMG-niň Nýu-Ýork şäherindäki edara binasynda Türkmenistanyň Ministrler Kabinetiniň Başlygynyň Orunbasary, Daşary işler ministri Raşid Meredow bilen BMG-niň Baş Sekretary Antoniu Guterreşiň arasynda dușuşyk geçirildi.

Baş Sekretar Türkmenistanyň hemişelik Bitaraplyk syýasatyna ýokary baha berdi we ýurduň ýolbaşçylarynyň alyp barýan daşary syýasatynyň parahatçylygy hem-de durnuklylygy üpjün etmekde üstünlikli mysaldygyny aýtdy.

BMG-niň ýolbaşçysy Türkmenistanyň hökümetine raýatsyzlygy ýok etmek ugrundaky tagallalary we bu ugurda yzygiderli ädimler üçin minnetdarlyk bildirdi.

Şol bir wagtyň özünde taraplar Birleşen Milletler Guramasy bilen Türkmenistanyň arasyndaky hyzmatdaşlygy ösdürmek, şeýle hem Owganystany öz içine almak bilen sebit parahatçylygy we howpsuzlygy meseleleri boýunça pikir alyşdylar. Şu nukdaýnazardan owgan halkyna yzygiderli berilýän kömege we goldawa ýokary baha berildi.

Taraplar BMG-niň Baş Sekretarynyň şu ýylyň iýul aýynda Türkmenistana amala aşyran saparynyň üstünlikli guralmagy hem-de onuň Alyhezreti Türkmenistanyň Prezidenti Serdar Berdimuhamedow we onuň Alyhezreti türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen geçirilen duşuşyklaryň netijeleri boýunça bir pikire geldiler. BMG-niň ýolbaşçysy saparyň ýokary guramaçylyk derejesi we myhmansöýerlik üçin minnetdarlyk bildirdi.

Türkmen tarapy ýurduň hemişelik Bitaraplyk hukuk ýagdaýyna esaslanýan daşary syýasatyny durmuşa geçirmäge ygrarlydygyna ynandyrdy. Şol bir wagtyň özünde Türkmenistanyň Prezidentiniň Baş Assambleýasynyň öňki mejlisinde öňe süren Ählumumy howpsuzlyk strategiýasyny işläp taýýarlamak başlangyjyny durmuşa geçirmekde BMG bilen ýakyndan hyzmatdaşlyk etmek niýeti yglan edildi.

BMG bilen strategiki hyzmatdaşlygy giňeltmek barada durup geçen R.Meredow, saparyň çäginde gazanylan ylalaşyklary durmuşa geçirmek boýunça meýilnamanyň taýýarlanylandygyny mälim etdi. Şu nukdaýnazardan BMG tarapyndan Türkmenistanyň başlangyjy bilen bütin halkara jemgyýetçiligi üçin 2025-nji ýylyň «Halkara parahatçylyk we ynanyşmak ýyly» diýlip yglan edilmeginiň ähmiýeti bellenildi. Şunuň bilen baglylykda 2025-nji ýylyň Halkara parahatçylyk we ynanyşmak ýyly diýlip yglan edilmegi mynasybetli çäreleriň Meýilnamasyny  taýýarlamak niýeti beýan edildi we onuň üstünlikli durmuşa geçirilmeginde BMG-niň ähmiýeti bellenildi.

Ministr Owganystana kömek meselesinde 11-nji sentýabrda türkmen-owgan serhedinde birnäçe iri ulag we energetika taslamalarynyň durmuşa geçirilmeginiň Owganystanyň halkyna kömek etmek ugrundaky yzygiderli syýasatyň aýdyň mysalydygyny belledi. Şeýle hem bu taslamalaryň halkara hukuk kadalarynyň çäginde takyk durmuşa geçiriljekdigi nygtaldy.

Türkmen tarapy raýatsyzlygy ýok etmek ugrundaky işlere ýokary baha berilendigi üçin minnetdarlyk bildirdi hem-de ynsanperwerlik ugrundaky işleriň Türkmenistanyň syýasatynyň we BMG bilen hyzmatdaşlygynyň ileri tutulýan ugurlarynyň biri bolup durýandygyny belledi.

Çeşme: Türkmenistanyň Daşary işler ministrligi