Merkezi Aziýanyň degişli pudaklaýyn edaralarynyň okuw-usulyýet resminamalaryny işläp taýýarlamaga jogapkär hünärmenleriniň gatnaşmagynda Türkmenistanyň Döwlet gümrük gullugynyň Okuw merkezinde harytlaryň toparlara bölünişi boýunça milli maslahat geçirildi.
Çärä gatnaşanlar harytlary sazlaşdyrmagyň beýany we kodlaşdyryş ulgamyna laýyklykda harytlary toparlara bölmek tejribesine garadylar. Harytlary suratlandyrmak we kodlaşdyrmak üçin sazlaşykly ulgam gümrük hyzmatdaşlygy geňeşiniň işläp düzen bitewi halkara önüm klassifikatorydyr. Onuň ulanylmagy dünýä söwdasynyň ähli ýurtlar üçin bitewi we düşnükli ygtybarly hem-de takyk hasabatyny toplamaga mümkinçilik berýär.
Ulgamda 21 bölüm we 99 topar bolup (olaryň 3-si ätiýaçlykdyr), ol dünýä söwda dolanyşygyndaky ähli önümleri göz öňünde tutýar. Klassifikasiýa önümleriň gelip çykyşy, ýerine ýetirýän wezipesi, himiki düzümi we önümçilik çig maly ýaly dürli tapawutly aýratynlyklaryna esaslanýar.
