Türkmenistanyň Prezidenti Serdar Berdimuhamedow Gurluşyk we senagat toplumynyň işgärleriniň güni mynasybetli ussat hünärmenlere we pudagyň zähmetkeşlerine gutlag Ýüzlenmesini iberdi. Döwlet Baştutanymyz öz gutlagynda toplumyň milli ykdysadyýetimizi özgertmekde, eksport mümkinçiliklerini giňeltmekde we halkymyzyň ýaşaýyş-durmuş şertlerini gowulandyrmakda eýeleýän strategik ornuny aýratyn belledi. Bu barada Türkmenistanyň Döwlet habarlar agentligi habar berdi.

Gutlag hatynda bellenilişi ýaly, ýurdumyzda amala aşyrylýan döwlet maksatnamalarynyň durmuşa geçirilmegi netijesinde bilim, saglygy goraýyş, önümçilik we durmuş maksatly döwrebap binalar toplumlary yzygiderli ulanmaga berilýär. Şu ýylyň dowamynda Türkmen döwlet binagärlik-gurluşyk institutynyň, Seýitnazar Seýdi adyndaky mugallymçylyk institutynyň täze binalary, Halkara onkologiýa, Pediatriýa we Stomatologiýa merkezleri, şeýle hem «Arçman» şypahanasynyň goşmaça binalar toplumy ýaly iri desgalaryň açylmagy gurluşyk pudagynyň çalt depginler bilen ösýändiginiň aýdyň subutnamasy hökmünde görkezildi.

Döwlet Baştutanymyz milli binagärlik däpleri bilen dünýä tejribesiniň sazlaşykly utgaşdyrylýandygyna ünsi çekip, Aşgabatda, Arkadag şäherinde we welaýatlarda alnyp barylýan «akylly» şäher bilen ýaşaýyş toplumlarynyň gurluşyklaryna ýokary baha berdi. Şeýle hem Senagat, Elektrik energetikasy, Himiýa senagaty we Ýol gurluşygy pudaklarynda ýerli çig mallary netijeli peýdalanmak, importyň ornuny tutýan önümçiligi ösdürmek we halkara tizlikli awtomobil ýollaryny gurmak arkaly ulag-logistika mümkinçiliklerini giňeltmek boýunça uly işleriň amala aşyrylyşy bellenilip geçildi.

Prezident Serdar Berdimuhamedow gutlagynyň soňunda gurluşyk we senagat toplumynyň ähli işgärlerine berk jan saglyk, maşgala abadançylygyny hem-de mähriban Watanymyzyň durmuş-ykdysady kuwwatyny artdyrmak ugrunda alyp barýan asylly zähmetlerinde täze uly üstünlikleri arzuw etdi.