Garaşsyz Döwletleriň Arkalaşygynyň Baş sekretary Sergeý Lebedew Türkmenistanyň paýtagtyna geldi. Saparyň esasy maksady şu ýylyň 22-nji maýynda Aşgabat şäherinde guralýan GDA-nyň Hökümet baştutanlarynyň Geňeşiniň nobatdaky mejlisine gatnaşmakdan ybaratdyr.

Aşgabadyň Halkara howa menzilinde belent mertebeli myhmany Türkmenistanyň daşary işler ministriniň orunbasary Ahmet Gurbanow garşylady. Howa menzilinde bolan gysga wagtly söhbetdeşligiň çäklerinde taraplar öňde duran ýokary derejeli sammitiň GDA agza döwletleriň arasyndaky köptaraplaýyn gatnaşyklary täze sepgitlere ýetirmekde we özara hyzmatdaşlygy berkitmekde uly ähmiýete eýedigini aýratyn nygtadylar.

GDA-nyň Hökümet baştutanlarynyň Geňeşiniň mejlisiniň dowamynda wekiliýetleriň ýolbaşçylary ykdysady we söwda hyzmatdaşlygyny çuňlaşdyrmak, sebitde ulag-logistika ulgamlaryny we täze geçelgeleri ösdürmek, şeýle hem medeni-ynsanperwer ugurlarda geljegi uly bolan bilelikdäki taslamalary durmuşa geçirmek ýaly möhüm meseleleriň giň toplumyny ara alyp maslahatlaşarlar.

Türkmenistan Garaşsyz Döwletleriň Arkalaşygynyň assosirlenen agzasy hökmünde guramanyň çäklerinde netijeli we özara bähbitli hyzmatdaşlygy täze many-mazmun bilen baýlaşdyrmaga we utgaşykly gatnaşyklary işjeňleşdirmäge gönükdirilen halkara başlangyçlaryň birnäçesini yzygiderli öňe sürýär.