Türkmenistanyň Mejlisiniň wekilleri 2026-njy ýylyň 4–5-nji sentýabrynda Özbegistan Respublikasynyň Samarkant şäherinde geçirilen Parlamentara Bileleşigiň ýaş parlament agzalarynyň 12-nji bütindünýä maslahatyna gatnaşdylar. Halkara duşuşyk ýaş parlamentarileriň arasynda tejribe alyşmak, hyzmatdaşlygy ösdürmek we ýaşlaryň hukuklaryny goramak boýunça netijeli pikir alyşmalar üçin möhüm meýdança boldy. Bu barada Türkmenistanyň Mejlisiniň metbugat gullugy habar berdi.

Halkara maslahat ýaşlaryň syýasy-jemgyýetçilik durmuşyndaky ornuny pugtalandyrmak, ýaş parlamentarileriň kanunçykaryjylyk we döwlet dolandyryş işlerine gatnaşygyny artdyrmak, olaryň hukuklaryny we deň mümkinçiliklerini üpjün etmek ýaly möhüm meselelere bagyşlandy. Çäräniň dowamynda ýaşlaryň arasynda özara ynamy, parahatçylygy we sebitara hyzmatdaşlygy ösdürmek, tejribe alyşmak hem-de ýaş nesliň jemgyýetçilik durmuşyndaky işjeňligini ýokarlandyrmak boýunça pikir alşyldy.

Maslahatyň açylyş dabarasynda ýaşlaryň hukuklaryny we azatlyklaryny goramak, ýaşlar syýasatynyň hukuk binýadyny berkitmek, olaryň mümkinçiliklerini doly durmuşa geçirmek üçin döredilýän şertler barada çykyşlar edildi. Şeýle hem döwletleriň durnukly ösüşini üpjün etmekde ýaşlara goldaw bermegiň möhüm ähmiýete eýedigi bellenildi.

Bölüm mejlisleriniň birinde Türkmenistanyň Mejlisiniň wekili çykyş edip, ýurdumyzda hormatly Prezidentimiziň ýolbaşçylygynda ýaşlaryň we zenanlaryň hukuklaryny, kanuny bähbitlerini goramak, olaryň jemgyýetdäki ornuny ýokarlandyrmak boýunça alnyp barylýan işler barada maglumat berdi. Çykyşda ýaşlaryň we zenanlaryň hukuklaryny üpjün etmek boýunça hereket edýän kanunçylyk binýady, olaryň döwlet dolandyryşyna, ykdysadyýetiň dürli ugurlaryna gatnaşygynyň giňeldilmegi hem-de halkara guramalar bilen hyzmatdaşlygyň ösdürilmegi barada aýratyn bellenildi.

Maslahatda dünýä ýurtlarynda ýaşlaryň syýasy mümkinçiliklerini giňeltmek, olaryň hukuklaryny we bähbitlerini goramak, jemgyýetçilik durmuşyndaky ornuny pugtalandyrmak boýunça alnyp barylýan işler ara alnyp maslahatlaşyldy. Ýygnaga gatnaşyjylar ýaşlaryň ykdysady garaşsyzlygyny üpjün etmegiň, zähmet bazarynda olaryň hukuklaryny goramagyň, ýaş telekeçileri goldamagyň ýurtlaryň ösüşine edýän täsiri barada pikir alyşdylar we degişli teklipleri öňe sürdüler.

Çykyşlarda täze tehnologiýalaryň ösdürilýän döwründe ýüze çykýan meseleler, sanly elýeterlilik, maglumatlaryň howpsuzlygy, ýaşlaryň täze başarnyklaryny ösdürmek we bu ugurda hukuk binýadyny kämilleşdirmek meselelerine hem üns berildi. Maslahatda ýaşlaryň daşky gurşawy goramak boýunça halkara başlangyçlardaky işjeň orny hem ara alnyp maslahatlaşyldy. Howanyň üýtgemegi, ekologiýa meseleleri, durnukly ösüşi üpjün etmek hem-de geljekki nesiller üçin arassa daşky gurşawy gorap saklamak boýunça ýaşlaryň teklipleriniň ähmiýeti nygtaldy.