Türkmenistanyň Prezidenti Serdar Berdimuhamedowyň başlyklyk etmeginde 18-nji iýulda sanly ulgam arkaly Ministrler Kabinetiniň nobatdaky mejlisi geçirildi. Mejlisiň Başlygy Dünýägözel Gulmanowa ýurdumyzyň kanunçylyk binýadyny döwrebaplaşdyrmak we kämilleşdirmek ugrunda amala aşyrylýan çäreler barada giňişleýin maglumat berdi. Bu barada «Türkmenistan: Altyn asyr» elektron gazeti habar berdi.

Türkmenistanyň Konstitusiýasynyň ýörelgelerine hem-de kabul edilen döwlet maksatnamalaryna laýyklykda, täze kanunlaryň taslamalaryny işläp taýýarlamak boýunça yzygiderli işler alnyp barylýar. Bu ugurda dürli ministrliklerden we pudaklaýyn edaralardan gelip gowuşýan teklipler düýpli seljerilip, hereket edýän kanunçylyk namalaryna döwrüň talaplaryna laýyklykda zerur bolan üýtgetmeler we goşmaçalar girizilýär.

Şeýle hem mejlisiň çäklerinde Keniýa Respublikasynyň Türkmenistandaky täze Adatdan daşary we Doly ygtyýarly ilçisinden ynanç hatlarynyň kabul edilendigi bellenildi. Ikitaraplaýyn duşuşykda iki döwletiň arasyndaky özara bähbitli hyzmatdaşlyk gatnaşyklaryny täze derejä çykarmak we ösdürmek bilen baglanyşykly meseleler ara alnyp maslahatlaşyldy.

Halkara hyzmatdaşlygy we parlamentara gatnaşyklary pugtalandyrmak ugrunda netijeli işler dowam etdirilýär. Ýurdumyzyň parlamentiniň agzalary Birleşen Milletler Guramasynyň (BMG) düzüm birlikleriniň hem-de Ýewropada Howpsuzlyk we Hyzmatdaşlyk Guramasynyň (ÝHHE) döwlet edaralary bilen bilelikde guran birnäçe okuw maslahatlaryna işjeň gatnaşdylar.

Türkmenistanyň Prezidenti Serdar Berdimuhamedow hasabaty diňläp, döwletimiziň hukuk ulgamyny has-da berkitmekde we jemgyýetçilik gatnaşyklaryny kadalaşdyrmakda täze kanunlaryň taslamalarynyň möhüm orun eýeleýändigini nygtady hem-de bu ugurdaky işleri yzygiderli dowam etdirmegiň zerurdygyny belledi.