«Hazaryň üsti bilen halkara ulag ugry» assosiasiýasy demir ýol ulgamy boýunça netijeli işleri alyp barýan «DB Engineering & Construction» nemes tarapy bilen hyzmatdaşlyk etmek hakyndaky Ähtnama gol çekdi.

 «Ähtnama «Ýewropa Bileleşigi bilen Merkezi Aziýanyň arasyndaky ulag baglanyşyklary» Global Gateway maýa goýum forumynyň çäginde Brýusselde gol çekildi. Resminama Ýewropa giňişliginde ulag ulgamlary boýunça hereketi kämilleşdirmek arkaly söwda-ykdysady gatnaşyklaryň mundan beýläk-de ösmegine itergi bermek üçin niýetlenendir» — diýip, assosiasiýanyň maglumatynda aýdylýar.

 Forumyň «Ýumşak baglanyşyk II: Geçelgäniň işi. Bilelikdäki hereket we sazlaşyk» atly sessiýasynyň çäginde çykyş eden assosiasiýanyň Baş sekretary Gaýdar Abdykerimow Hazaryň üstünden geçýän halkara ugrunyň häzirki infrastruktura mümkinçilikleri barada hasabat berdi we foruma gatnaşyjylary Ýewropa Bileleşigi bilen Merkezi Aziýanyň ulag ulgamlaryny işjeň birleşdirmäge çagyrdy.

 Ýeri gelende bellesek, «Hazaryň üsti bilen halkara ulag ugry» assosiasiýasy 2014-nji ýylda esaslandyrylyp, şu ýyl onuň döredilenine 10 ýyl dolýar. 2023-nji ýylda şu ugur boýunça 2,7 million tonnadan gowrak ýük daşaldy. Muňa garamazdan, onuň mümkinçilikleri üç esse ýokarydyr. Assosiasiýa 2016-njy ýyldan bäri işleýär.
Çeşme: https://www.mincom.gov.tm/tk/news/