Türkmenistanyň Prezidenti, Türkmenistanyň Ýaragly Güýçleriniň Belent Serkerdebaşysy Serdar Berdimuhamedow ýurduň harby we hukuk goraýjy edaralarynyň harby gullukçylarynyň hem-de işgärleriniň bir toparynyň Türkmenistanyň medallary bilen sylaglanylmagy hakynda Permana gol çekdi.

Resminama laýyklykda, harby we hukuk goraýjy edaralaryň harby gullukçylarynyň hem-de işgärleriniň Bitarap Türkmenistanyň Garaşsyzlygyny we özygtyýarlylygyny pugtalandyrmaga, goranmak ukybyny berkitmäge, çäk bitewüligini, konstitusion gurluşyny goramaga, howpsuzlygy, jemgyýetçilik we hukuk tertibini, kanunçylygy üpjün etmäge goşan uly şahsy goşantlary nazara alyndy.

Ýene bir Permana laýyklykda, harby we hukuk goraýjy edaralaryň harby gullukçylarynyň hem-de işgärleriniň bir toparyna harby we ýörite atlar dakyldy, hünär derejeleri berildi. Bu resminama harby we hukuk goraýjy edaralaryň harby gullukçylarynyň hem-de işgärleriniň ýurduň goranmak ukybyny pugtalandyrmaga goşan goşantlaryny hem-de jemgyýetimizde kanunçylygy we hukuk tertibini berkitmekde, asudalygy gorap saklamakda bitiren uly hyzmatlaryny göz öňünde tutup gol çekildi.

Çeşme: "Türkmenistan: Altyn asyr" elektron gazeti