Türkmenistanyň paýtagtynda Bitaraplygyň 30 ýyllygyna bagyşlanan ýadygärligiň açylyşy we onuň öňündäki meýdançada baýdaklaryň galdyrylmagy mynasybetli dabaraly geçirildi. Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow onda çykyş etdi.

Daşary işler ministri öz çykyşynda Halkara parahatçylyk we ynanyşmak forumyna gatnaşmak üçin Aşgabada gelen ähli wekiliýetlere çuňňur minnetdarlyk bildirip, munuň ynsanperwerlik we adalatlylyk ýörelgelerine umumy ygrarlylygy görkezýändigini nygtady.

Forum, esasan, birnäçe möhüm seneleri we başlangyçlary ýatlaýandygy üçin möhümdir: BMG-niň Baş Assambleýasy tarapyndan Türkmenistanyň başlangyjy bilen yglan edilen we ähli agza döwletler tarapyndan biragyzdan goldanylan 2025-nji ýylyň "Halkara parahatçylyk we ynanyşmak ýyly" diýlip yglan edilmegi; Halkara Bitaraplyk güni; Türkmenistanyň hemişelik Bitaraplygynyň şanly 30 ýyllygy.

Ýadygärligiň açylyşynyň BMG-niň 80 ýyllygyny belleýän ýylynda geçirilmegi aýratyn simwoliki mana eýedir. Täze toplum parahatçylygy, howpsuzlygy we hyzmatdaşlygy ýola goýmak üçin onlarça ýyllap dowam eden ählumumy tagallalara hormaty alamatlandyrýar. Ýadygärlik Türkmenistanyň Bitaraplygynyň konsepsiýasyny beýan edýär, dostlugy, özara düşünişmegi, ynamy, agzybirligi we raýdaşlygy özünde jemleýär.

"Ýadygärligiň açylyşy ýurduň saýlan taryhy ýoluny we bitaraplygyň içerki we daşarky syýasatyny kemala getirmekdäki esasy ornuny hem alamatlandyrýar. Bu esasy statusdan ugur alyp, Türkmenistan durnukly ösüşe, howanyň üýtgemegine garşy göreşmäge, adam hukuklaryny goramaga we köptaraplaýyn hyzmatdaşlygy giňeltmäge gönükdirilen milli we halkara maksatnamalaryny durmuşa geçirýär" diýip, Raşid Meredow aýtdy.

Wise-premýer toplumyň Bitarap Türkmenistanyň paýtagty Aşgabatda ýerleşýändigine garamazdan, onuň habarynyň milli çäklerden has uzaklara ýaýraýandygyny nygtady.

"Ol ähli halklar üçin açyk giňişlik hökmünde kabul edilýär, her bir milletiň garşydaşlyk däl-de, gepleşik arkaly parahatçylyga, howpsuzlyga we ösüşe hukugynyň bardygyny ýatladýar. Halkara tejribede bitaraplyk, köplenç, "ynam köprüsi", bölýän däl-de, birleşdirýän gurluş hökmünde atlandyrylýar. Türkmenistan daşary syýasatynda BMG-niň Tertipnamasyna esaslanyp, ähli döwletleriň özygtyýarlylygyny goldap we parahatçylykly hyzmatdaşlyk medeniýetini ösdürip, hut şuňa eýerýär" diýip, Raşid Meredow aýtdy.

Çeşme: "Türkmenistan: Altyn asyr" elektron gazeti