Türkmenistanyň Prezidenti Serdar Berdimuhamedowyň adyna onuň doglan güni mynasybetli dünýä döwletleriniň ýolbaşçylaryndan tüýs ýürekden gutlaglar we hoşniýetli arzuwlar gelip gowuşýar.

Özbegistanyň Prezidenti Şawkat Mirziýoýew öz hatynda hormatly Serdar Berdimuhamedowy doglan güni bilen tüýs ýürekden gutlap, onuň parasatly ýolbaşçylygynda Türkmenistanyň sebit we ählumumy ähmiýetli başlangyçlarynyň dünýä bileleşigi tarapyndan giň goldawa eýe bolýandygyny belledi. Özbegistanyň döwlet baştutany türkmen-özbek gatnaşyklarynyň yzygiderli ösdürilmegine uly ähmiýet berýändiklerini nygtap, strategik hyzmatdaşlygyň mundan beýläk-de üstünlikli dowam etdiriljekdigine berk ynam bildirdi. Şeýle hem, ol hormatly Prezidentimize berk jan saglyk, maşgala abadançylygyny we döwlet işinde täze üstünlikleri arzuw etdi.

Gazagystanyň Prezidenti Kasym-Žomart Tokaýew hem hormatly Prezidentimizi doglan güni bilen gutlap, onuň döredijilikli syýasatynyň netijesinde Türkmenistanyň durnukly ösüşiniň üpjün edilýändigini nygtady. Ol gazak-türkmen gatnaşyklarynyň giň mümkinçiliklere eýedigini aýdyp, hyzmatdaşlygyň täze derejelere çykarylmagyna uly umyt baglaýandygyny belledi. Şeýle-de, Gazagystan Prezidenti hormatly Serdar Berdimuhamedowy resmi sapar bilen ýurduna gelmegine sabyrsyzlyk bilen garaşýandygyny aýtdy.

Slowakiýanyň Prezidenti Peter Pellegrini bolsa, öz hatynda döwlet Baştutany Serdar Berdimuhamedowyň adyna tüýs ýürekden gutlaglaryny beýan edip, berk jan saglyk, egsilmez güýç-kuwwat we üstünlik arzuw etdi. Ol Slowakiýa bilen Türkmenistanyň arasyndaky dostlukly gatnaşyklaryň umumy bähbitlere esaslanýandygyny belläp, hyzmatdaşlygyň mundan beýläk-de ösdüriljekdigine ynam bildirdi.

Bu gutlag hatlary Türkmenistanyň Prezidentine bildirilen belent hormatyň, şeýle hem ýurdumyzyň halkara abraýynyň yzygiderli ýokarlanýandygynyň aýdyň beýanydyr.

Çeşme: "Türkmenistan: Altyn Asyr" elektron gazeti