Jemgyýetçilik guramalarynyň merkezinde 13-nji sentýabrda Dünýä türkmenleriniň ynsanperwer birleşiginiň XXVI maslahaty geçirildi. Ýurdumyzyň durmuşynda möhüm orny eýeleýän şanly senäniň — Garaşsyzlyk gününiň öňüsyrasynda geçirilen maslahatyň işine daşary döwletleriň birnäçesinde kowçum bolup ýaşaýan türkmenleriň wekilleri, Diýarymyzyň dürli künjeklerinden gelen wekiliýet toparlary gatnaşdylar.

Maslahatyň öňüsyrasynda oňa gatnaşyjylar Jemgyýetçilik guramalarynyň merkeziniň eýwanynda ýaýbaňlandyrylan, halkymyzyň baý medeni mirasyny, taryhyny, özboluşly däp-dessurlarynyň köpöwüşginliligini açyp görkezýän şekillendiriş we amaly-haşam sungatynyň sergisini synladylar.

Soňra maslahata gatnaşyjylar hormatly Prezidentimiz Serdar Berdimuhamedowyň olara iberen Gutlagyny diňlediler.

“Türkmen halkynyň Milli Lideri, Türkmenistanyň Halk Maslahatynyň Başlygy, Dünýä türkmenleriniň ynsanperwer birleşiginiň Prezidenti Gahryman Arkadagymyzyň nusgalyk işleri netijesinde Garaşsyzlygymyzyň we hemişelik Bitaraplygymyzyň sütünlerini berkitmekde ägirt uly işler amala aşyrylyp, eziz Watanymyz syýasy, ykdysady, medeni-ynsanperwer ugurlarda ynamly ösýän döwletleriň biri hökmünde ykrar edildi we parahatçylygyň, dostlugyň, bagtyýarlygyň ýurduna öwrüldi” diýip, hormatly Prezidentimiz Gutlagynda nygtady.

Soňra maslahatyň gün tertibi biragyzdan tassyklanyldy. Forumyň dowamynda DTYB-nyň agzalary tarapyndan ýerine ýetirilen işler barada hasabatlar diňlenildi. Şeýle hem onda Berkarar döwletiň täze eýýamynyň Galkynyşy döwründe birleşigiň işini mundan beýläk-de ösdürmegiň geljekki ugurlary ara alnyp maslahatlaşyldy.

Maslahatda seredilen möhüm meseleler, Dünýä türkmenleriniň ynsanperwer birleşiginiň işiniň ähmiýetini has-da ýokarlandyrmaga we konstruktiw döwletara gatnaşyklaryň ösmegine goşant goşmak üçin niýetlenendir.

Soňra birleşigiň agzalaryny Hormat hatlary bilen sylaglamak dabarasy geçirildi.

Çeşme: "Türkmenistan: Altyn asyr" elektron gazeti